രാജ്യത്തെ വിദ്യാഭ്യാസ മേഖലയുടെ പുനരുദ്ധാരണത്തിന് ലക്‌ഷ്യം വച്ചുകൊണ്ടുള്ള  സമഗ്രമായ മാറ്റങ്ങൾ ഉൾക്കൊള്ളുന്ന ബിൽ പാർലമെന്റ് പാസ്സാക്കി. ഓസ്‌ട്രേലിയൻ ടെർഷ്യറി എഡ്യൂക്കേഷൻ കമ്മീഷൻ എന്ന ബില്ലിലെ ശുപാർശകൾ  ഉടൻതന്നെ രാജ്യത്ത് നടപ്പാക്കുമെന്ന് ഫെഡറൽ സർക്കാർ അറിയിച്ചു. ഇതനുസരിച്ച് രാജ്യത്തെ സർവകലാശാലയിൽ നിന്നുള്ള ബിരുദത്തിനു തത്തുല്യമായ പരിഗണന ടേഫ് കോഴ്‌സുകൾക്കും, മറ്റ് തൊഴിലധിഷ്ഠിത ഡിപ്ലോമ കോഴ്‌സുകൾക്കും ലഭിക്കും.

വിദ്യാഭ്യാസ മേഖലക്കുള്ള ഫണ്ടിങ് ഘടന തന്നെ പൊളിച്ചെഴുതപ്പെടുന്നതെന്ന് കരുതുന്ന പുതിയ നീക്കങ്ങൾ രാജ്യത്തെ വിദ്യാഭ്യാസ മേഖലയുടെ കരുത്തുവർധിപ്പിക്കുമെന്ന് സർക്കാർ അവകാശപ്പെടുന്നു. പുതിയ നിയമം യാഥാർഥ്യമാകുന്നതോടെ സർവകലാശാലയിൽ നിന്നും ടേഫ്  കോഴ്‌സുകളിലേക്കും, തിരിച്ചുമെല്ലാം വിദ്യാർഥികൾക്ക് പുതിയ പത്ത് വേ തുറക്കപ്പെടും. മറ്റ് സാങ്കേതിക ബുദ്ധിമുട്ടുകളില്ലാതെ തന്നെ പരസ്പരം കോഴ്‌സുകൾ തിരഞ്ഞെടുക്കാനും, മാറ്റം വരുത്താനും പുതിയ ബില്ലിൽ ശുപാർശ ചെയുന്നുണ്ട്.

ഓസ്‌ട്രേലിയയിലെ വിദ്യാഭ്യാസ-പരിശീലന മേഖലയിലെ ഒരു വലിയ നാഴികകല്ലാണിതെന്നും, രാജ്യത്തെ തൊഴിലവസരങ്ങൾക്ക് അനുയോജ്യമായ രീതിയിൽ വിദ്യാർഥികളെ സജ്ജരാക്കുവാൻ പുതിയ വിദ്യാഭാസ കമ്മീഷൻ യാഥാർഥ്യമാകുന്നതോടെ സാധിക്കുമെന്നും സ്‌കിൽഡ് ആൻഡ് ട്രെയിനിങ് മന്ത്രി ആൻഡ്രു ഗൈൽസും സൂചിപ്പിച്ചു.