വെസ്റ്റേൺ ഓസ്ട്രേലിയയിൽ ആദ്യമായി വീട് സ്വന്തമാക്കാൻ ആഗ്രഹിക്കുന്നവർക്കായി സർക്കാരിന്റെ പുതിയ സഹായ പദ്ധതിയിലൂടെ വലിയ ഇളവുകൾ പ്രഖ്യാപിച്ചു. ഇനി ആദ്യ വീട് വാങ്ങുന്നവർക്ക് വെറും 2% ഡെപ്പോസിറ്റ് നൽകി വീടുകൾ സ്വന്തമാക്കാം.

“Help to Buy” എന്ന പദ്ധതിയിലൂടെ, ഏകദേശം  $860,000 വരെ വിലയുള്ള വീടുകൾക്ക്  ഈ ഇളവ് ലഭ്യമാകും. ഇതിലൂടെ സാധാരണയായി ആവശ്യമായ വലിയ ഡെപ്പോസിറ്റ് തുകയില്ലാതെ തന്നെ സാധാരണക്കാർക്ക്  വീടെടുക്കാൻ കഴിയുന്നതാണ് പ്രധാന നേട്ടം. പദ്ധതിയുടെ ഭാഗമായി, വീടിന്റെ വിലയുടെ ഒരു വിഹിതം സർക്കാർ ഏറ്റെടുക്കും.

– പുതിയ വീടുകൾക്കായി സർക്കാർ 40% വരെ
– നിലവിലുള്ള വീടുകൾക്കായി 30% വരെ പങ്കാളിത്തം വഹിക്കും

ഇതോടെ വാങ്ങുന്നവരുടെ വായ്പാ ഭാരം ഗണ്യമായി കുറയും.

ഉദാഹരണം:
$800,000 വിലയുള്ള ഒരു വീട് വാങ്ങുമ്പോൾ, വെറും $16,000 (2%) ഡെപ്പോസിറ്റ് മതി. ശേഷിക്കുന്നതിൽ ഒരു വിഹിതം, അതായത് 40% തുകവരെ  സർക്കാർ ഏറ്റെടുക്കുന്നതിനാൽ, ബാങ്ക് ലോൺ തുക, അഥവാ തിരിച്ചടക്കേണ്ട തുക താരതമ്യേന കുറഞ്ഞിരിക്കും. ചുരുക്കത്തിൽ 42% തുക കഴിഞ്ഞുള്ള ലോണിന് മാത്രം പലിശ നൽകിയാൽ മതിയാകും.

എന്നാൽ, ഈ പദ്ധതിയിൽ സർക്കാർ വീടിന്റെ ഒരു വിഹിതം ഉടമസ്ഥതയിലുള്ളതിനാൽ, ഭാവിയിൽ വീട് വിറ്റാൽ ആ വിഹിതം തിരികെ നൽകേണ്ടതുണ്ടെന്നത് ശ്രദ്ധിക്കേണ്ടതാണ്.

കൂടാതെ, ഈ പദ്ധതിക്ക് വരുമാനപരിധികളും നിലവിലുണ്ട്.

– വ്യക്തികൾക്ക് ഏകദേശം $100,000 വരെ
– ദമ്പതികൾക്ക് ഏകദേശം $160,000 വരെ

വീടുകളുടെ ഉയർന്ന വിലയും ജീവിതച്ചെലവും വർധിക്കുന്ന സാഹചര്യത്തിൽ, ആദ്യമായി വീടെടുക്കുന്നവർക്ക് ഈ പദ്ധതി വലിയ സഹായമാകും എന്ന് സർക്കാർ പ്രതീക്ഷിക്കുന്നു