ന്യൂ സൗത്ത് വെയിൽസിലെ ന്യൂ കാസ്റ്റിൽ എന്ന തീരദേശ പട്ടണത്തിലേക്ക് കുടിയേറിയ ഒരുപറ്റം മലയാളി സുഹൃത്തുക്കൾ ചേർന്ന് രൂപം കൊടുത്ത ഈ ഭൂഖണ്ഡത്തിലെ ആദ്യത്തെ മലയാളികളുടെ ജലാശയ ഇൻവെസ്റ്റ്മെന്റിലൂടെ ഒരു ചരിത്രമെഴുതി ചേർത്തു. കുടിയേറ്റ മലയാളികൾ അതാത് പ്രദേശങ്ങളിൽ തങ്ങളുടെ കൂട്ടായ്മകൾക്ക് നേതൃത്വം നൽകുമെങ്കിലും വെള്ളത്തിൽ പണമെറിയുന്നത് അത്യപൂർവ കാഴ്ചയാണ്. 50 കുടുംബങ്ങളിൽ നിന്നായി 239 പേരടങ്ങുന്ന ക്ലബ് അംഗങ്ങൾ ചേർന്ന് രൂപം നൽകിയ ന്യൂ കാസ്റ്റിൽ മലയാളി ബോട്ട് ക്ലബ് ഇതോടെ ഓസ്‌ട്രേലിയൻ മലയാളി സമൂഹത്തിന് പുതുചരിത്രമാണ് സമ്മാനിച്ചിരിക്കുന്നത്.

സിഡ്‌നി, മെറ്റ്ലാന്റ്, ന്യൂകാസ്റ്റിൽ എന്നിവിടങ്ങളിൽ താമസിക്കുന്നവരാണ് ക്ലബ്ബ് അംഗങ്ങൾ. താല്പര്യമുള്ളവർക്ക് ഈ ചരിത്രയാത്രയിൽ ഭാഗഭാക്കാകാനും അവസരമുണ്ട്. സതേൺ ഹെമിസ്ഫിയറിലെ തടാകത്തിലെ  ഓളപ്പരപ്പിൽ ആർത്തുല്ലസിക്കുവാൻ ആഗ്രഹമുള്ളവർക്ക് ക്ലബ്ബിന്റെ കവാടം തുറന്നിട്ടിരിക്കുകയാണെന്ന് പ്രസിഡണ്ട് അരുൺ അറിയിച്ചു.

ജെറ്റി റോവിങ്, വാട്ടർ പവർ സ്പോർട്ട്, ജെറ്റ്സ്കി റൈഡ്, ഫിഷിങ്, കാനോയിങ് എന്നിങ്ങനെ ജലാശയ സ്പോർട്ട്സുകളിൽ ശ്രദ്ധയൂന്നുന്ന ക്ലബ്ബിന്റെ പ്രവർത്തനോദ്ഘാടന ചടങ്ങിൽ വികാരി ഫാ. ജോയ്‌സ്,ക്ലബ് ഫൗണ്ടർ ടോണി, പ്രസിഡണ്ട് അരുൺ, സെക്രട്ടറി അർണോൾഡ്, സ്പോൺസർമാരായ  A1 ഫിനാൻസ് ഉടമ അജീഷ്, കവറെക്സ് വിൻഡോസ് ഫാഷൻ ഉടമ സാൻസ്, ബെല്ലെ പ്രോപ്പർട്ടി ഉടമ ജിസ് എന്നിവർ പങ്കെടുത്തു.