ഓസ്‌ട്രേലിയൻ നഗരങ്ങളിൽ ഈ വരുന്ന ഞായറാഴ്ച നാഴികമണികൾ  ഒരു മണിക്കൂർ പുറകിലേക്ക്നീക്കിവെക്കും. ഈസ്റ്റർ ദിനമായ ഏപ്രിൽ 5 ഞായറാഴ്ച  വെളുപ്പിന് 4 മണിയാകുമ്പോഴാണ് എല്ലാ ഘടികാരസൂചികളും ഒരു മണിക്കൂർ പിന്നോട്ടാക്കി 3 മണിയാക്കി മാറ്റുന്നത്. ഇതോടെ ഡേ ലൈറ്റ് സേവിങ്ങ് നടത്തുന്ന സ്‌ഥലങ്ങളിൽ ഞായറാഴ്ചത്തെ ഒരു മണിക്കൂർ കൂടുതലായി കിട്ടും. രാത്രി ജോലി ചെയ്യുന്നവർക്ക് ഒരു മണിക്കൂർ കൂടുതൽ  ജോലി ചെയ്യേണ്ടി വരുമെന്ന് സാരം. മൊബൈൽ ഫോണുകളും, കമ്പ്യുട്ടറുകളുമെല്ലാം സ്വന്തമായി അതാത് പ്രദേശങ്ങളിൽ സമയം മാറുമെങ്കിലും അനലോക് ക്ലൂക്കുകളിലും, വാച്ചുകളിലും, മറ്റ് ഉപകരണങ്ങളിലും നാം തന്നെ ഒരു മണിക്കൂർ പിന്നിലേക്കാക്കി സമയം ക്രമീകരിക്കണം.

ഓസ്‌ട്രേലിയയിലെ ന്യൂ സൗത്ത് വെയിൽസ്, വിക്ടോറിയ, സൗത്ത് ഓസ്ട്രേലിയ, ടാസ്മാനിയ, ഓസ്‌ട്രേലിയൻ ക്യാപിറ്റൽ ടെറിട്ടറി എന്നിവിടങ്ങളിലാണ് സമയമാറ്റം നടപ്പാക്കുന്നത്.  രാജ്യത്തെ തന്നെ മറ്റ് പ്രധാന സംസ്‌ഥാനങ്ങളായ ക്വീൻസ് ലാന്റ്, വെസ്റ്റേൺ ഓസ്‌ട്രേലിയ, നോർത്തേൺ ടെറിട്ടറി എന്നിവിടങ്ങളിൽ സമയമാറ്റം നിലവിലില്ല.

രാജ്യത്തെ ശൈത്യകാലത്തിന്റെ വരവിനെ സ്വാഗതം ചെയ്തുകൊണ്ടാണ് സമയമാറ്റം ക്രമീകരിക്കുന്നത്. വേനലിനെ വരവേൽക്കുവാൻ ഇനി ഒക്ടോബർ മാസത്തിലെ ആദ്യത്തെ ഞായറാഴ്ച ഇതുപോലെത്തന്നെ ഘടികാരസൂചികൾ ഒരു മണിക്കൂർ മുന്നോട്ടാക്കി സമയം മാറ്റിവെക്കും.