മെൽബൺ: തണുപ്പുകാലം പടിവാതിൽക്കൽ എത്തിയതോടെ ഓസ്‌ട്രേലിയയിൽ ഡേലൈറ്റ് സേവിങ് സമയം അവസാനിക്കുന്നു. അടുത്ത മാസം അഞ്ചാം തീയതി മുതൽ രാജ്യത്തെ പ്രധാന സംസ്ഥാനങ്ങളിൽ ക്ലോക്കിലെ സമയം ഒരു മണിക്കൂർ പുറകോട്ട് മാറ്റും. ഇതോടെ ദശലക്ഷക്കണക്കിന് ആളുകൾക്ക് ഒരു മണിക്കൂർ അധികം ഉറങ്ങാൻ സാധിക്കുമെന്നതാണ് പ്രത്യേകത.

ഏപ്രിൽ അഞ്ചിന് പുലർച്ചെയാണ് ന്യൂ സൗത്ത് വെയ്ൽസ്, വിക്ടോറിയ, സൗത്ത് ഓസ്‌ട്രേലിയ, ടാസ്മാനിയ, ഓസ്‌ട്രേലിയൻ ക്യാപിറ്റൽ ടെറിട്ടറി എന്നിവിടങ്ങളിൽ സമയം പുനക്രമീകരിക്കേണ്ടത്. സ്മാർട്ട്‌ഫോണുകളും കമ്പ്യൂട്ടറുകളും സ്വയമേവ സമയം പുതുക്കുമെങ്കിലും പഴയ ക്ലോക്കുകളിലും കൈഘടികാരങ്ങളിലും മാറ്റങ്ങൾ നേരിട്ട് വരുത്തേണ്ടി വരും. എന്നാൽ ക്വീൻസ്‌ലാന്റ്, വെസ്റ്റേൺ ഓസ്‌ട്രേലിയ, നോർത്തേൺ ടെറിട്ടറി എന്നിവിടങ്ങളിൽ ഈ മാറ്റം ബാധകമല്ല.

പകലിലെ വെളിച്ചം പരമാവധി പ്രയോജനപ്പെടുത്തുന്നതിനായി വേനൽക്കാലത്ത് സമയം ഒരു മണിക്കൂർ മുന്നോട്ട് നീക്കുന്ന രീതിയാണ് ഓസ്‌ട്രേലിയ പിന്തുടരുന്നത്. തണുപ്പുകാലം എത്തുന്നതോടെ ഇത് പഴയപടിയാക്കും. ഇതുവഴി അതിരാവിലെ കൂടുതൽ വെളിച്ചം ലഭ്യമാക്കാനും ഊർജ്ജ ഉപഭോഗം കുറയ്ക്കാനും സാധിക്കുമെന്നാണ് വിലയിരുത്തൽ. ഓസ്‌ട്രേലിയയിലെ ഈ സമയമാറ്റം വിദേശ രാജ്യങ്ങളുമായുള്ള ആശയ വിനിമയത്തെയും വിമാന സർവീസുകളെയും ബാധിക്കാറുണ്ട്.