മെൽബൺ : രാജ്യത്ത് മോഷണം മുൻപും ഉണ്ടെങ്കിലും വീടുകൾ കുത്തി തുറന്നുള്ള മോഷണങ്ങൾ വളരെ കുറവായിരുന്നു. എന്നാൽ സമീപകാലത്തായി അതും ഏറിവരുന്നതായി റിപ്പോർട്ട്. ഈസ്റ്റ് മെൽബണിലെ വാന്റർനാ സൗത്ത് സബർബിലെ സമീപപ്രദേശത്തെ അഞ്ചു വീടുകളിലാണ് മോഷണശ്രമം നടന്നത്. ഇതിലൊരു വീട്ടിൽ നിന്നും വിലപിടിപ്പുള്ള വസ്തുക്കളും, മൊബൈൽ ഫോണും, ലാപ്ടോപ്പും മോഷണം പോയാതായി പോലീസ് പറഞ്ഞു.

ശനിയാഴ്ച പുലർച്ചെ 5 മണിയോടെയാണ് ഫ്രീമാന്റിൽ ഡ്രൈവിലെ ഒരു വീട്ടിൽ അതിക്രമിച്ച് കയറാൻ ശ്രമിക്കുന്നതിനിടയിൽ കള്ളന്റെ ചിത്രം സുരക്ഷാ ക്യാമറായിൽ പതിഞ്ഞത്. ആ വീട്ടിൽ അകത്തുകടക്കാൻ കഴിയാതെ വന്നപ്പോൾ തൊട്ടടുത്ത വീട്ടിലെ ഗേറ്റ് ചാടിക്കടന്ന് കവർച്ചനടത്തുവാൻ ശ്രമിക്കുന്നതിനിടയിൽ പട്ടി കുറച്ച് ബഹളം വച്ചതിനെ തുടർന്ന് ശ്രമം ഉപേക്ഷിച്ചു.  തൊട്ടടുത്ത സ്ട്രീറ്റിലെ മറ്റൊരു വീട്ടിലെ ഗാരേജിൽ കിടന്ന ടൊയോട്ട RAV4 കാർ മോഷ്ടാക്കൾ കൊണ്ടുപോയി.