മെൽബൺ : ഓസ്‌ട്രേലിയയിലെ ഭിന്നശേഷി ഇൻഷുറൻസ് പദ്ധതിയായ NDIS പദ്ധതിയിൽ സമീപകാലത്തായി തട്ടിപ്പുകൾ ഏറി വരുന്നതായി റിപ്പോർട്ട്. മെൽബണിലെ ഒരു സ്‌ഥാപനത്തിന്റെ പേരിൽ 8 ലക്ഷം ഡോളർ തട്ടിയെടുത്ത സംഘത്തിലെ അഞ്ചുപേരെ കോടതി ശിക്ഷിച്ചു. സംഘത്തിലെ പ്രധാനിയെ 7 വർഷം തടവുശിക്ഷയും മറ്റു 2 പേർക്ക് അഞ്ചു വർഷത്തെ തടവും സംഘത്തിലെ രണ്ട്‌ സ്ത്രീകൾക്ക് കമ്യുണിറ്റി സേവനവും, മറ്റു ശിക്ഷകളും  കോടതി വിധിച്ചു.

സമീപകാലത്തായി ഇത്തരത്തിൽ വ്യാപകമായ തട്ടിപ്പുകൾ ശ്രദ്ധയിൽ പെട്ടിട്ടുണ്ടെന്ന് അന്വേഷണ സംഘം അഭിപ്രായപ്പെട്ടു. ഭിന്നശേഷിക്കാരായ കുട്ടികളുള്ള കുടുംബങ്ങൾ പോലും പലവിധത്തിൽ കൃത്രിമം കാട്ടി പണം തട്ടിയെടുക്കുന്നതായും റിപ്പോർട്ടിലുണ്ട്. സ്വന്തം പേരിൽ ഒരു NDIS സ്‌ഥാപനം തുടങ്ങി അതിന്റെ തണലിൽ  വ്യാജ രേഖകൾ ഹാജരാക്കി പണം തട്ടുന്ന സ്‌ഥാപനങ്ങളും കൂണുപോലെ മുളച്ചുപൊങ്ങുന്നതായി റിപ്പോർട്ടിലുണ്ട്.

ജനങ്ങളുടെ നികുതിപ്പണം ദുരുപയോഗം ചെയുന്നത് ഒരു തരത്തിലും അനുവദിക്കില്ലെന്നും, ഇത്തരം തട്ടിപ്പുകൾ നടത്തുന്നവർക്ക് കടുത്ത പ്രത്യാഘാതങ്ങൾ നേരിടേണ്ടിവരുമെന്നും, പൊതുപണം സംരക്ഷിക്കുന്നതിനും, ക്ഷേമ സംവിധാനങ്ങളുടെ വിശ്വാസ്യത ഉറപ്പുവരുത്തുന്നതിനും വിവിധ അന്വേഷണ ഏജൻസികളെ ഏകോപിപ്പിച്ചുകൊണ്ട് വരും നാളുകളിൽ കർശനമായ അന്വേഷണങ്ങൾ നടത്തുമെന്ന്  എ എഫ്.പി. ഡിറ്റക്ടീവ് സൂപ്രണ്ട് ബെർണാഡ് ഗീസൻ മുന്നറിയിപ്പ് നൽകി