എട്ട് വർഷത്തെ നിരന്തര ചർച്ചകൾക്കൊടുവിൽ, ലോകത്തിലെ രണ്ടാമത്തെ വലിയ സമ്പദ്‌വ്യവസ്ഥയായ യൂറോപ്യൻ യൂണിയനുമായി ഓസ്‌ട്രേലിയസ്വതന്ത്ര വ്യാപാരകരാർ യാഥാർഥ്യമായി. ഓസ്‌ട്രേലിയ-യൂറോപ്യൻ യൂണിയൻ സ്വതന്ത്ര വ്യാപാര കരാർ യാഥാർഥ്യമാകുന്നതോടെ ഓസ്‌ട്രേലിയയ്ക്കും യൂറോപ്യൻ യൂണിയനും ഇടയിലുള്ള വ്യാപാര, നിക്ഷേപ തടസ്സങ്ങൾ മാറും. പ്രത്യക്ഷമായിത്തന്നെ ഏകദേശം 450 ദശലക്ഷം ഉപഭോക്താക്കൾക്ക് വരും നാളുകളിൽ ഗുണകരമാകുന്ന കരാർ ഓസ്‌ട്രേലിയൻ ചരിത്രത്തിലെ സുപ്രധാനമായൊരു നാഴികക്കല്ലാണ്.

പ്രധാനമന്ത്രി ആന്റണി അൽബനീസും യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്നും, വ്യാപാര, ടൂറിസം മന്ത്രി സെനറ്റർ ഡോൺ ഫാരെലും, യൂറോപ്യൻ വ്യാപാര, സാമ്പത്തിക സുരക്ഷാ കമ്മീഷണർ മരോസ് സെഫ്‌കോവിച്ചും ചേർന്ന് സ്വതന്ത്ര വ്യാപാര കരാറിനായുള്ള ചർച്ചകൾ വിജയകരമായി അവസാനിച്ചതായി പ്രഖ്യാപിച്ചു.

പുതിയ കരാർ നിലവിൽ വരുന്നതോടെ ഓസ്‌ട്രേലിയയുടെ നിലവിലെ കയറ്റുമതി മൂല്യത്തിന്റെ 98 ശതമാനവും യൂറോപ്യൻ യൂണിയനിൽ ഡ്യൂട്ടി ഫ്രീയായി നൽകും. കാർഷിക ഉൽപ്പന്നങ്ങൾക്ക് യൂറോപ്യൻ യൂണിയൻ ഏർപ്പെടുത്തിയിട്ടുള്ള ഏതാണ്ട് എല്ലാ തീരുവകളും ഒഴിവാക്കുന്നതിലൂടെ ഓസ്‌ട്രേലിയൻ കർഷകർക്കും ഉൽപ്പാദകർക്കും പ്രയോജനകരാകും.

വൈൻ, നട്‌സ്, പഴങ്ങളും പച്ചക്കറികളും, തേൻ, ഒലിവ് ഓയിൽ, മിക്ക പാലുൽപ്പന്നങ്ങളും, ഗോതമ്പ്, ബാർലി, സമുദ്രവിഭവങ്ങൾ, ബീഫ്, ആട്ടിറച്ചി, പഞ്ചസാര, അരി, ഗോതമ്പ് ഗ്ലൂറ്റൻ, സ്കിംഡ് പാൽപ്പൊടി, പ്രകൃതിദത്ത വെണ്ണ എന്നിവ ഇതിൽ ഉൾപ്പെടുന്നു. ചുരുക്കത്തിൽ ഓസ്‌ട്രേലിയൻ വൈൻ ഉൽപ്പാദകർക്കും കയറ്റുമതിക്കാർക്കും മാത്രം പ്രതിവർഷം ഏകദേശം 37 മില്യൺ ഡോളറിന്റെ നേട്ടമുണ്ടാകും.

യൂറോപ്യൻ യൂണിയനിൽ നിന്നുള്ള ഇറക്കുമതിക്ക് ഓസ്‌ട്രേലിയയും മിക്ക താരിഫുകളും നീക്കം ചെയ്തതിനാൽ യൂറോപ്യൻ വൈൻ, സ്പിരിറ്റ്, ബിസ്‌ക്കറ്റുകൾ, ചോക്ലേറ്റുകൾ, പാസ്ത തുടങ്ങിയ ഉൽപ്പന്നങ്ങൾക്ക് ഓസ്‌ട്രേലിയൻ മാർക്കറ്റിലും വില കുറയും.

ഇരു രാജ്യങ്ങളും തമ്മിലുള്ള ഔദ്യോഗിക ആഭ്യന്തര നടപടിക്രമങ്ങൾ പൂർത്തിയാകുന്നതോടെ ഓസ്‌ട്രേലിയ-യൂറോപ്യൻ യൂണിയൻ സ്വതന്ത്ര വ്യാപാര കരാർ പൂർണ്ണ അർഥത്തിൽ യാഥാർഥ്യമാകും.