എയർ ന്യൂസീലാന്റ് അടക്കമുള്ള ഓഷ്യാനിയയിലെ മുൻ നിര വിമാനകമ്പനികൾ ഇലക്ട്രിക് സാങ്കേതിക വിദ്യയിലേക്ക് കടക്കുവാൻ ആലോചിക്കുന്നു. തുടരെത്തുടരെയുള്ള ഇന്ധന പ്രതിസന്ധി പരിഹരിക്കുവാൻ തുടക്കമെന്ന നിലയിൽ റീജിണൽ സർവീസുകളിൽ ഇന്ധനത്തിനുപകരമായി ഇലക്ട്രിക് സാങ്കേതിക വിദ്യ ഉടൻ പരീക്ഷിക്കുമെന്ന് എയർ ന്യൂസീലൻഡ് സി.ഇ.ഒ  നിഖിൽ രവിശങ്കർ അറിയിച്ചു. ഏറെ വൈകാതെ മറ്റ് അയർലൈൻസും ഇത്തരം സാങ്കേതികവിദ്യകൾ പരീക്ഷിക്കുമെന്നും അദ്ദേഹം പ്രതീക്ഷ പ്രകടിപ്പിച്ചു.

മിഡിൽ ഈസ്റ്റിലെ സംഘർഷം കാരണം ഇന്ധനവില കുതിച്ചുയരുന്ന സാഹചര്യത്തിൽ, ഓസ്‌ട്രേലിയയിലെയും ന്യൂസിലൻഡിലെയും ജനങ്ങൾ കൂട്ടത്തോടെ ഇലക്ട്രിക് വാഹനങ്ങളിലേക്ക് (EV) മാറുന്നു.

ആഗോളതലത്തിൽ രൂപപ്പെട്ട ഇന്ധന പ്രതിസന്ധി മറികടക്കുവാൻ ജനങ്ങൾ കൂടുതലായി ഇലക്ട്രിക് വാഹനങ്ങളെ ആശ്രയിക്കുന്നതായും കണക്കുകൾ സൂചിപ്പിക്കുന്നു.  മിക്ക ബാങ്കുകളിലും ഇലക്ട്രിക് കാറുകൾക്കുള്ള ലോണുകളിൽ ഇക്കഴിഞ്ഞ മാസങ്ങളിൽ രണ്ടിരട്ടിയിലധികം വർധിച്ചതായും ബാങ്കുകൾ സൂചിപ്പിച്ചു.

യുദ്ധത്തിന് തൊട്ടുമുൻപ് വരെ മന്ദഗതിയിലായിരുന്ന ഇലക്ട്രിക് കാർ വിപണി കഴിഞ്ഞ ഒരു മാസമായി പ്രതിശീർഷ വിൽപ്പനയിൽ രണ്ടിരട്ടിയിലേറെ വർധിച്ചതായി നിർമ്മാതാക്കളും അറിയിച്ചു. ഈ വർഷമവസാനത്തോടെ ഓസ്‌ട്രേലിയയിലെയും, ന്യൂ സീലാന്റിലെയും കാർ വിപണിയിലെ 20 ശതമാനവും ഇലക്ട്രിക് കാറുകൾ കയ്യടക്കുമെന്നും കണക്കുകൾ സൂചിപ്പിക്കുന്നു.